【英國生活】Mirror 肚皮舞？

我發覺呢度嘅人好多都仲未分清楚香港人同國內人嘅分別。

例如有一位印度裔嘅肚皮舞老師，有一次問我哋：「我最近收咗好多中國裔學生，我想揀啲佢哋鐘意嘅歌去練習，你哋聽開咩歌？」

咁你知啦，國內人聽嘅歌同我哋香港聽嘅歌可以好唔同㗎嘛，於是我哋就問清楚係大陸地區定香港地區。
佢驚訝反問我哋，乜唔係一樣架嘛？

咁我哋解釋返兩者嘅文化、語言、環境都會有啲分別。

然後佢話唔識分辨佢啲學生係香港人定大陸人。

咁我哋就問返佢學生嘅年齡層。佢話差距好大，有十幾歲，亦有老人家。

於是我哋比咗幾個歌手名比佢：
如果年紀大嘅學生，可以揀啲好似黎明、郭富城嘅歌
如果年紀輕啲嘅學生，可以揀Mirror、Error，呢兩個係香港比較流行嘅組合。

佢最後袋咗幾個名，話返屋企聽下佢哋啲歌。
希望有朝一日可以睇到以 Mirror/Error 為配樂嘅肚皮舞表演啦！