香港學車考車之體驗+筆記 2022

我啱啱考完車,呢篇千字文學車 / 考車懶人包,由報名流程、筆試路試點樣備戰,以至賽後檢討都有,今次我想分享我嘅考車牌流程 / 學車之經驗,希望可以比大家參考!

呢幾年因各種因素,多咗好多人學車,希望拎到張車牌。可惜遇上疫情,考車排期條龍長又長,而能夠成功考到車牌1 Take Pass亦都唔容易 (見下圖),如果衰咗又要再排過期,分分鐘加埋重考要攪兩年或以上…

計劃考車第一件事,就要先諗去邊度學。

1/ 揀駕駛學院好定係揀私人師傅(街師傅)好?

揀指定駕駛學院好處

.學院有固定場地,以泊車、窄路調頭為例,練習、考試或會喺同一個場地,熟能生巧,相對比較容易Pass

.學院會提供一站式代辦及比較全面嘅服務,唔洗走嚟走去

.課程款項可以Claim持續進修基金,如果之前未Claim過仲可以拎到高達8成款項添 (記得睇埋條款細節呀)

揀私人師傅嘅好處

學車費用較平:學院通常都要綑綁式Package收費,有啲無咁有用嘅課程都可能包埋落去,加上一站式代辦服務,價錢相對比較高。而跟出面師傅,每位師傅收費也不一,而課堂堂數亦可以按個人進度而調整,相對便宜。 (按運輸署駕駛考試指引建議,一般學車者應接受至少30小時的駕駛訓練,才可達到基本駕駛技術水平。)

私人教車師傅選擇較多:教車師傅質素參差,如果師傅教得唔好,學院都可以轉師傅,但學院師傅數量有限,選擇或會比私人少,而如果跟私人師傅學,因為無學院所限,選擇相對比較多。

排路試期比較快:一般學院排期比出面路試慢幾個月,依家如果你合格咗筆試,根據運輸署喺2022年9月10日嘅駕駛考試輪候時間表,合併試平均要等319日,而學院就更加要等1年以上。

目標為本:因為無駕駛學院嘅固定場地,學車時要同出面車路爭,相對多突發嘢發生,但相反吸收多咗路面經驗,拎到車牌會更有信心揸出街。

駕駛學院與私人師傅 – 考車合格率比較 (圖片來源:香港01)

2/ 準備考車筆試

最後我揀咗跟出面師傅學車,帶埋身份證、最近三個月內發出嘅地址證明,填妥 申請表格(TD82),然後到運輸署 (長沙灣政府合署二樓) 報名,比埋 $510 駕駛考試費用 。

而我揀嘅係1A (私家車自動波、合併試)

攪掂手續後,職員就會比份「筆試(甲部)排期信」同一本「道路使用守則」藍色書你,大約等個幾月左右,就要考筆試。

考車筆試一共有 2 0 條電腦 選擇題 (MC)題目,20分鐘作答時間,答啱16條或以上就及格,成績會即場通知。

我的筆試準備3寶:

A/ 道路使用守則

主要睇熟呢本藍色書仔就可以考試,我由頭睇到落尾,用螢光筆間埋重點,因為文字題嘅用字比較挑剔,記得熟讀書仔入面嘅「交通標誌」,呢啲係送分題嚟㗎!

B/ 學車筆試2022 App

為學車人士提供超過800條嘅筆試試題,免費下載(有廣告版),無廣告版 HK$15 ,搭車又玩、等人又玩,做熟佢合格信心大增!

iOS 下載: https://apps.apple.com/hk/app/%E5%AD%B8%E8%BB%8A%E7%AD%86%E8%A9%A6-2022%E5%B9%B4%E7%89%88/id1565498898

Google Play下載:

https://play.google.com/store/apps/details?id=com.hklocals.carexamprep&hl=zh_HK&gl=US

「學車筆試」App好全面,你可以揀溫習圖片題、文字題或模擬筆試
每一次做模擬筆試,APP都有記錄

C/ 模擬考車筆試:學車王

根據運輸署嘅《道路使用者守則》編制,內裡收集多達500多條甲部筆試練習題,有電腦網頁版以及APP選擇:

網頁版:https://www.drivingking.hk/test/testReal

溫提:以上模擬筆試練習只能作輔助練習,到你真係考試時,啲題目唔會完全一樣㗎!(仲有啲題目係我未溫習過添

D/ 自己入腦筆記

藍色書仔入面,有啲數字好難記入腦,於是我就用圖像記憶法去記,例如要記「運載貨物、長車及拖車」嘅數字:

如車上載有伸懸於車外的貨物,在日間能見度高的情況下,你必須在貨物後端附有一塊至少1平方米大小的紅旗。不可有以下載貨情形,或駕駛有以下載貨情形的車輛: • 貨物伸出車前超過 1.5米; • 貨物伸出車後超過 1.4米;貨物伸出車外,以致總 闊度(包括貨物和車輛) 超過2.5米; • 貨物連車身高於《道路交 通(車輛構造及保養)規 例》指明該車輛的整體高度 (例如,輕型貨車:3.5 米,中型/重型貨車:4.6 米);或 • 所運載貨物的高度可令 貨物撞毀路上的架空物 件或電線。用拖車繩或拖車鍊拖車 時,兩輛車之間的距離不可超過4.5米… 在車身總長度超過13米的貨車或其拖車架尾部需要標記…

我的圖像記憶法筆記
有啲難記嘅標誌,我就列印出嚟

最後我筆試合格,即場收到路試排期信 (如果跟學院嘅就要等學院通知)。 10個月後,我就要考路試,仲要係抽到有難度頂級之稱嘅培正道…


3/ 準備考車路試

路試分為兩個部份,分別係:乙部-泊車掉頭,以及丙部-路面考試

因為知道教車師傅質素參差,好師傅難求,搵到一個夾到你嘅教車師傅有時都要講緣份,我聽過身邊啲人講啲教車師傅教得有幾差,又或者師傅嘅脾氣影響到佢嘅學習情緒,甚至聽過某教車師傅KOLs 貨不對辦等等,如果揀唔啱師傅要臨急搵補鐘師傅就麻煩喇。

有關搵教車師傅,你可以試下打聽身邊朋友有無介紹,亦可以從中知道師傅嘅教法啱唔啱你。而我就經朋友介紹搵到陳師傅,朋友考培正道都係靠佢1 TAKE PASS㗎。

咁當我考完筆試,知道考車路試日期後,就同佢預約 (每個師傅做法唔同,我師傅係當確定BOOK佢期時,就要先比考試租車錢同考試鐘費用),再等考前 3 – 4* 個月先搵佢正式學車。

*有關考車前幾耐開始學車比較好,運輸署建議一般學車者應接受至少30小時嘅駕駛訓練,至於點樣編排課程時間就要睇你學習進度同習慣,有啲人鐘意縮短一星期兩三日,一個月學晒又有,好似我咁慢慢拖長學又有。


申請學牌

喺準備路試學車前,記得先申請學牌 – 學習駕駛執照(私家車、輕型貨車、電單車及機動三輪車),由於有效期只有一年,過期要再比錢續證,有鑑於呢幾年因疫期關,駕駛考試(考路試)輪候時間要等好耐,所以建議大家喺準備跟師傅學車前先至去申請,咁如果衰咗又咁啱排到快期就唔洗再比錢續多次嘛。

申請學習駕駛執照(學牌)好簡單,帶齊路試排期信、最近三個月內發出嘅地址證明、身份證,填妥學牌申請表 TD555、同費用 ($548) ,再到運輸署(長沙灣政府合署二樓) 攪手續就可以。(建議網上預約,免卻輪候時間


我的學車過程

由於我知道自己學習能力比較慢,所以我預鬆咗大約4個月前就開始學車,初初每星期一堂2節 ( 90分鐘),臨考個幾日就密密學。陳師傅唔鬧人,亦都好耐心教導。以下係我大約學車課堂嘅內容:

其實我都慶幸預早少少時間開始學,因為中間經歷過做咗新冠病毒確診者嘅密切接觸者,需要家居隔離,亦經過過打風、師傅無期、返工OT等情況而更改課堂日期,所以實際我只係上咗16堂32節。


第一次學泊車比人恰

話說練習泊車係需要同出面街嘅人爭車位,之前幾堂都搵唔到車位,今堂終於霸到位學泊車喇!

師傅set 咗支腳架代替考試嘅雪糕筒,再帶我落車睇下個位大約要點泊,跟住上返車準備學泊車。

師傅講乜我做乜,打左燈,望右鏡,確保後面冇車,再拉R好慢咁倒車…

我哋一路望右鏡,突然,有架車(上圖右邊架車)原來攝咗入嚟我哋想泊嘅位,我哋即時煞咗車。個條火爆司機話我撞花佢架車(個一粒小點?我睇唔到花咗喺邊)

佢鬧我師傅點教車,叫我師傅賠 $500 刮花粒小點嘅錢 @@
我師傅話我架車 bumper 比你架車撞爛咗,點計?
佢反話佢架 cheap 車唔夠硬淨… 😒

明明學緊車,比架車攝埋嚟,仲反告我哋,個位司機報警,等差人嚟落口供,司機係我,佢話要保留追究權利…

嗰位司機擺明恰我呢啲學車仔,堂又冇得上,仲要落埋簿仔,今日好黑仔…

好彩師傅係到,佢好冷靜幫我處理,就算佢架車個bumper 爛咗都冇怪責我,仲識講笑話下次儲錢換架硬淨啲嘅車添!


考路試前一個月 – 溫習考車路線

開始要睇熟考試路線,除咗列印張地圖參考外,亦會睇YouTube望清楚考試條路同考車秘技。

考路試前兩星期的準備 – 到試場觀察

去現場睇實況 (提自己中線過埋黃格仔轉右線)

因為部份考試道路係學習禁區,唔比學牌練習,你只能考試時揸,所以建議行下考試路線,而更重要嘅,記得去埋考試中心睇下個考試環境同睇下人點考 (注意:試場不得拍攝),因為考乙部(泊位+窄路調頭)時正式考試位無得練習,一次定生死,泊位個場仲要係少少暗斜,好多考生因為咁而衰咗…

此外,亦可以叫朋友喺一星期前嘅考試時間,揸車載你去行下考試路線,了解嗰段時間嘅路面狀況,睇下多唔多學生同車等等。


考路試前三日 – 臨急抱佛腳

由於考車乙部 (泊車同窄路調頭)秘訣係「車慢軚快」,有感於自己喺臨考前仲未好好掌握到軚盤同腳掣嘅力度,加上考試信心不足,於是諗起用軚盤練習,我就臨急臨忙去Game舖買咗個Switch專用賽車方向盤 + 腳掣 返屋企做練習 (因為家中有SWITCH),價錢大約 $900。

開頭我仲買咗賽車遊戲《NEED TO SPEED》(價錢$270 ) 打算練習路試,但因為速度太快了,玩玩下就無玩 ,反而用佢嚟玩 MARIO KART ,輕鬆地玩住練習,很不錯!

我仲發現到一個超有用嘅模擬考車路線練習!只要著住平時學車嘅鞋,電腦播住考試路線嘅YouTube片,左右兩邊放一塊境,一邊睇片一邊模擬扮揸車,打燈、望鏡、擰頭望盲點 (擰頭要擰到掂到膊頭嘅角度),練習咗短短3日,因為有工具比我模擬練習,我由考試信心40% 增加至70-80% !太好喇!早知早啲買啦…


考車試場路線睇片練習例子 – 學車王

培正道考試路線1 / 公主道 橋底轉右

培正道考試路線2 / 橋底轉左

培正道考試路線3 / 佛光街

另外,培正道閘口亦係好多考生容易出錯嘅地方,呢條片教點樣出閘,我覺得幾有用:


4/ 考路試,遇上突發事

我覺得要考車合格,運氣係好重要!就好似我考路試,遇上好多突發不幸事,當中去到最尾培正道轉右上文福道呢個黃格仔,發生咗一件我唔識處理嘅事⋯

我重組返個案情:

去到文福道轉彎個燈口 (呢段培正道唔比學牌練習,我都係考試第一次行),我排第一 (位置就係白VAN),有個阿伯唔行紅錄燈,走出道路,經黃格仔慢慢橫跨 8 條線 (紅箭咀方向)… 你會點處理? (見下圖)

(圖片來源:GOOGLE MAPS)

行人應該經紅綠燈過馬路,理論上係唔應該走出馬路,但現實還現實,佢就係發生咗,而我當時認知只係知黃格仔唔可以停車,但我唔知如果有人行黃格仔,我要等到幾時先開車…

我當時嘅做法係:

1/ 當時綠燈我照停喺路口,希望佢快啲過…

2/ 可惜等到第二次綠燈,阿伯過完我想轉彎個度,但佢無上石磗,仍然仲喺黃格仔入面 (見下圖白衫公仔)

3/ 我見到後面都有車等緊我,咁我就慢慢駛入黃格內

4/ 開車後,突然又有個南亞人從佢左邊欄杆位行咗出嚟,想好似阿伯咁橫過 (見下圖紅衫公仔)

5/ 於是我喺黃格仔中間停底咗等佢過,而佢見到我架車就行返轉頭上行人路 (註:雖然我停低只係半秒,但係黃格仔唔應該車停㗎)

6/ 結果我路試肥咗, 原因係「不顧及其他道路使用者」,師傅教得好好,所有嘢我都做到,只係臨場表現唔好 >_<

當時我開車嘅印象情況
圖片來源:Google Maps + Stickers

事後冷靜完,我WhatsApp 問師傅可以點做,師傅話應該耐心等晒3條線嘅黃格仔無人,我先開車轉右上山…


5/ 後記

終於打晒成個學車流程同過程,我寫呢篇文嘅目的,係希望大家唔好重蹈覆轍我嘅錯誤,同埋分享我少少嘅學車心得。今時今日學車咁貴、排期又耐、考車又難,我都希望大家可以 1 TAKE PASS!

師傅教咗車20年,佢話對比返以前考車,主要係安全到達,合格率相對比依家高,但今時今日香港路上車太多,考官評分都會比較嚴格,做少咗動作都有機會肥!

以上只係我嘅個人經驗,謹供大家參考,亦不會作任何回應,如果跟衰咗唔關我事㗎 :P


瀏覽最新文章:

發佈留言

發佈留言必須填寫的電子郵件地址不會公開。

這個網站採用 Akismet 服務減少垃圾留言。進一步了解 Akismet 如何處理網站訪客的留言資料