勁怕水!第三次學游水…成長日誌

序:點解我咁怕水?

一切就要由我細個講起…

記憶好矇朧,記得第一次到兒童游泳池,見到條滑梯好興奮,個條滑梯類似公園膠滑梯,唔算高,即刻衝上去樓梯再滑落嚟,點知滑落嚟時直沉喺水底,唔識企返喺身… 吸咗水入去個感覺好辛苦,個刻先知水位雖然只係小朋友大約腰以下嘅位置,不過玩水上滑梯唔同普通公園滑梯,前者要先吸一啖氣,落地企返喺身。

自此,父母就甚少比我去玩水,怕我再次浸親(?) 千祈唔好學佢哋嘅諗法!

我覺得細個應該要學游水

我漸漸就對水產生恐懼…

——

我首兩次學游水失敗經驗

我覺得游水除咗係一種運動,亦係一種自救嘅技能,如果萬一遇上水災又或者喺撞船等意外,識游水起碼唔會係第一個浸死XD 所以我好羨慕識游水嘅人。

我曾經學過兩次游水,一次係學校游水4堂,一次係工X聯,但最終都係失敗!主要都係導師未能兼顧到咁多人,同時間我仲未克服到水嘅關口…

間唔中亦有朋友教我克服水性,用盡方法幫我,可惜心理作用影響大,都係失敗…

咁又唔係完全失敗嘅,至少我最後學到由用力扶池邊去浮,到可以用力拎住浮板浮,都算係有個進步,不過依然都係勁怕水,同埋浮唔起!

——-

第三次學游水!學習全記錄!

原本我已經認命對游水無緣,拒絕一切水上活動!有一日朋友C出POST分享佢嘅游水初體驗,佢又係細個比水浸親,依家決心重學游水,睇完佢嘅POST令我又重燃返想學游水,比自己最後一次機會!

與其想學游水,我更想學浮水,記得報名表格有一條問題:「你嘅游水目標係咩?」當時我唔抱有任何游水期望,只係想揀:「學識浮水」,可惜無呢個答案…

我好開心可以同朋友們一齊學游水,佢哋仲開咗個群組叫「幾廿歲人拎住浮板」,因為我哋4個都好想摵甩浮板,學識游水!

6.11 第一堂:學浮

一無嘢掂就好無安全感,身體好似唔相信自己可以浮…

我哋相約上堂前一個鐘進行特訓,朋友C教我之前體驗班嘅一啲技巧,之後正式上課,老師教我拎住浮板學浮水,同埋點樣企喺身,其他同學第一堂尾升已經可以摵甩浮板浮,可惜我仍然要捉實浮板…

—-

6.14 第一堂課後練習 – 比小朋友串超失敗

#比個細路串到灰9咗 #幾廿歲人仲拎住浮板

灰到爆⋯點練習都克服唔到心理關口⋯仲要頭先落水特訓比個細路仔串:「點解姐姐咁大個人仲要用浮板⋯」我都唔想用佢,個個都叫我放鬆啲,我都想放鬆,但身體唔聽話我可以點⋯ 我知道細個比水浸親唔係一個借口,但我真係喺水入面好冇安全感⋯已經第三次學游水喇,連YouTube 都搵埋教學點克服,個個同學仔都可以四腳浮,又係得我仲係未能衝破到個關口⋯

朋友安慰:

唔好畀其他人嘅說話影響你!每個人有自己嘅節奏!

—–

6.18 第二堂:學浮神器!

朋友T:「你恐懼水, 對手想捉住嘢會學唔到(或者學得慢),所以要用浮圈或夾手臂果種嚟游…」

GOOD IDEA!不過網上搵到嘅浮圈都係比小朋友用,邊度先有大人用?好彩教練個度有得幫手買!

開始上堂教練比咗個浮圈我,話:

只要有浮圈上身,身體點都唔會沉!

因為我仲未開始到手腳放鬆浮,因此今堂主要都係複習上堂浮,不過呢個浮圈簡直係我救星!戴住佢我開始有返個安全感!喺整堂入面,我只試過一兩次輕輕掂住浮板去浮,其餘都要浮圈+捉實浮板一齊先可以浮。

同學仔鼓勵我:

「雖然只係一兩次輕輕掂住,但你已經有好大進步!你一定得㗎!」

————

6.22 第二堂課後練習:浮到喇!

屋苑個游泳池係室外,相比公共游泳池好少人,練習相對舒服!我繼續練習:先扶實浮板練浮,再少少掂住浮板浮,不過喺練習後十幾分鐘後,突然落大雨!啲雨水大打大打落我臉,有啲痛!><

或者因為咁,我更加唔想塊臉露出水面,喺呢個時候,我喺淺水區漸漸練成到唔洗用浮板,四肢浮了!!! 係一個里程碑呀!YEAH~ 希望可以繼續KEEP到啦!

#不過都要有浮圈幫手

浮圈係我嘅安全圈,謝謝你!

————

6.25 第三堂:學蛙腳

今堂又係早一個鐘約同學仔去泳池練習,原來我真係需要時間WARM UP㗎!開頭我又係勁緊張,需要浮板+浮圈輔助浮,到練習45分鐘左右,我先可以唔用浮板,用浮圈輔助去浮!四肢浮到好開心!

而今堂MISS就教我蛙式腳,小腿抬起 –》45度 –》踢出去 –》夾腳 –》HOLD 2 秒 –》再重覆!

可能我仲未消除對水恐懼,我每個動作都太用力,原地踏步,水花四濺。同學仔話:腳背唔好露水面,要踢落水,就唔會有水花出現!

好!我再試下練習先!

7.8 第三堂課後練習 – 成功自己浮到喇!

今晚去咗個唔比用浮板浮圈嘅泳池,練咗大約40分鐘,我終於可以唔靠任何嘢浮起了!!再練埋蛙腳還可以,但一用埋蛙手就好驚⋯

#特訓 #有個泳鏡印 #其實我仲好驚水 #暫時摵甩大蚊圈

7.9 第四堂 – 回到起點…

只係隔咗一晚⋯我搵唔返尋晚浮游嘅成功感覺,連浮圈都幫唔到手,退步到拎住浮板先識浮… 充滿挫販感嘅一堂

#泳池人太多 #不過總算學咗換氣節奏 #游水我係零天份 #攰

7.13 第四堂課後練習 – 應該係地點問題

今次去私人泳池好少人,我用咗45分鐘終於適應到浮喇!可以唔洗拎任何嘢都浮到!不過我都係唔敢大動作郁蛙腳

#幾時先克服到怕水 #人多好驚驚 #冇用大蚊圈同浮板


小總結

上咗4堂我就無上落去喇… 因為一來其他同學仔進步得好快,好多都識咗游,我唔想有比較。。。二來暑假人太多,公眾泳池好多人橫衝直撞,我估呢個係我唔敢放膽浮嘅原因,我上堂亦學唔到任何嘢,只會繼續拎浮板… 不過只要我去咗一個少人嘅泳池,比時間我適應就可以慢慢浮到。我諗我都係適合後者慢慢嚟。。。祝我加油!


8.12 私人游 – 我成功游到對岸喇!

因為無繼續上小班游水堂,依家轉咗去私人泳池,由先生做我游水教練!呢度無公眾泳池咁多人,令我可以放膽用自己進度去學。嘩!今日又有新突破!用咗15分鐘練返浮,然後用浮板學換氣同蛙腳但因為掂到地一直學唔好,仲要越游越往後,於是某人掉我落深水區練⋯

初初我喺深水區好驚,跟住適應咗之後竟然不知不覺學咗換氣同游向前!!!然後我就好似鴨仔bb咁,捉實浮板跟住媽媽游向前喇!太神奇了!第一次游到去對岸,要記錄下!

#謝謝特訓私人敎練 #超怕水嘅我係一個大突破