日本旅行遇上超強颱風,停電停網停航點算好?滯留小島見聞錄

之前我哋去日本某小島 沖永良部島,旅行遇上超強颱風潭美,停電、停網絡又停航,被迫滯留小島,一齊睇下我哋點樣迎接颱風嘅來臨啦!下次一旦遇上旅行停電,你都懂得如何應付,做足準備!

日本旅行遇上超強颱風,颱風吹襲小島前後之風景:

沖永良部島(日語:沖永良部島/おきのえらぶじまOkinoerabu-jima)是奄美群島中的一個島嶼,位於德之島與與論島之間,面積94.5平方公里,相等於一個香港島咁大,為珊瑚礁隆起形成的島嶼。行政區屬於鹿兒島縣,島上設有和泊町和知名町,居民約14,000人。

【 01 – 有關沖永島部島 】

地理位置:
位於沖繩北部,屬於鹿兒島県
生活簡撲,是潛水、釣魚、洞穴探險好地方

人口:
約13000人

目的:
探日本朋友,體驗洞穴探險

預計逗留天數:
2日

點去?
可以選擇坐飛機或坐船
如果坐飛機的話,由沖繩那霸出發約40分鐘,由鹿兒島出發則需約1小時

【 02 – Day 1 /27-10-18 飛去沖永良】

暫時告別沖繩,坐JAC內陸機去鹿兒島的沖永良部島

飛機可容納48位乘客,約40分鐘就見到小島,第一眼印象係個島好平,無高山,好多田地,同埋啲水好清,見到海底㗎!

知道有個超強颱風潭美,48小時後由沖繩直衝去鹿兒島,途中風眼會喺島上經過,希望個風加速兼減弱,可以如期順利回來

今晚住喺海邊酒店,擁抱太平洋,勁大風,吹到窗邊砰砰聲,海浪亦都越打越高,明明望到無際嘅海洋應該開心,不過因為打風關係,呢幾日唔想住近海⋯

【 03 – Day 2 /28-09-18 風來了!滯留沖永良】

原本我哋喺沖永良部島安排咗一連串節目,因為超強颱風潭美來勢洶洶,來到呢個一日得一班機嘅荒蕪平地,仲要窗邊望見太平洋海浪一浪接一浪,我個心真係怯一怯,小島打風我超冇安全感⋯如果有得揀,我寧願喺沖繩度過颱風⋯

先生體諒我嘅不安,尋晚同JAC航空公司確定提早改機位今日飛、取消預約探險、安排酒店等等⋯ 點知今日去到機場,先知道來往沖繩嘅航機取消!因為那霸機場取消晒航班… OMG! 意味住我要滯留呢個小島多幾日⋯ 依家未打風已經大浪到咁,聽晚風眼喺頭上面經過會係點? 不敢想像!

【 06 – 我的海邊酒店 】

颱風就快嚟,知道要喺小島過,就要立即做足準備,先生同朋友琴美安排搵到間遠離岸邊多少少,有個小山丘嘅酒店,(不過都係近海,只係冇望得咁清楚),而且酒店安排咗二樓嘅背海房,相對較靜。

全島應該得我同佢係香港人,呢個島又冇高山可以向上走, 好擔心會有風暴潮、水災等其他自然災害

#打咭告之臉書大神#見到機場但又走唔到

【 07 – 買食物 】

酒店講明聽日好大機會會全島停電,叫我哋自備食物,佢仲打定個底比我哋知,上年全島就試過停電7日!OMG!


搵咗酒店,放低行李後,我哋去超市買食物,不過全島得呢間超市比較大,啲麵包同水都已經被掃清, 我開心發現有一排排大支水,但原來係酒⋯

去到第二間超市,勉強比我哋搵到最後一支水,同埋買咗呢幾日嘅食物
唔敢諗幾時會返到屋企,只求平安渡過

【08 – 外遊時遇上風災怎麼辦?】

以下係我哋嘅少少體會:


1. 準備足夠食物和用具
。食物方面:
— 可以預多啲食物同水
— 首選不是杯麵(怕冇熱水供應)
— 宜選提子、香蕉等生果容易食,補充水份又飽肚
— 朱古力,高熱量

。用具方面:
— 電筒 (停電超有用)
— 哨子 (有乜事可求救)
— 扇 ( 窗外打風,不宜開窗,若然停電,室內必定又熱又焗)

2. 定期把情況及位置匯報給家人


3. 以紙筆寫定求助熱線,passport 及家人等聯絡方法,萬一手機無電都有保障

4. 和旅伴用不一樣的電話咭
(好重要!好重要!如果個台死咗就攬炒)


5. 儲定水以備不時之需
包括飲用水同普通水,以防停水
我哋問酒店拎咗兩個保溫瓶裝水,又用膠樽同浴缸儲水

6. 叉夠尿袋


7. 準備定娛樂節目

時間流流長搵定啲嘢做,例如畫畫,下載定apps , 書等等

【 09 – 風雨前夕 – 章魚燒派對 】

可能天氣關係,同上次超強颱風山竹一樣,全日都頭痛⋯ 之後去咗琴美屋企hea , 謝謝款待,今晚有章魚燒派對,仲有飯糰同冬瓜湯、納豆秋葵同甜品,飽飽

琴美有個歲半嘅囡囡,囡囡活潑好動,經常四圍走四圍跌,日本媽媽通常都係由得佢到處跌跌碰碰,相反香港媽媽就會勁擔心,每一步都要睇住。

個風聽晚九點左右先經過上空,睇嚟聽日有排發呆了⋯

【 10 – 停電好煩惱 】

為停電做準備,呢兩日嘅食物,應該充足🤗
颱風24號大約喺今晚9點上空經過,今早出咗避難勸告,大風又大雨,不過酒店話我哋住石屎屋唔洗走⋯

中午全島進入停電,電視無訊號,Wi-Fi,電話咭數據都斷埋,我哋唔知出面嘅情況,好在仲有漫遊數據服務

—————————
1. 冇得睇電視,不知出面最新情況
2. 冇風扇又冇冷氣,打風不能開窗,房內又熱又焗
3. 冇得吹頭,洗完頭冇得即刻訓覺
4. 冇娛樂設施,好悶
5. 冇熱水,冇得煲水飲、冇得沖熱水涼、又冇得淥杯麵
6. 雪櫃冇電,新鮮食物宜盡快食
7. 冇燈,名符其實日出而作,日入而息
8. 冇得上網,斷絕外界聯繫
9. 冇得叉電,所有電子設備要慳住用
10. 冇得碌咭襟錢,只能付現金

【 11 – 停電如何消磨時間? 】

全島停電,間房又黑又焗又熱又靜,淨係聽到出面橫風橫雨聲,成日流流長,做咩好?

#其實香港好幸福

【 12 – 我們的食物 】

好在酒店樓下仲有熱水可以斟,唔洗淨係食朱古力,可以淥杯麪

【 13 – 時間過得太慢 】

要諗諗點樣消磨時間,畫下窗外風景:

【 14 – OMG!無帶鎖匙 】

8:00PM,先生話冇熱水落去樓下煲水,我同佢拎咗支電筒,離開房先發現鎖匙喺房內,大鑊!!

全座客樓客房又黑又靜,只有我哋同一位日本婆婆旅客入住,外面風雨砰砰聲,酒店嘅接待處電話又壞咗,點求救?唔通要喺走廊瞓成晚?叫天不應叫地不聞。原本先生諗住出去外面行去大館搵幫手,但依家係颱風嘅暴風區,最大風大雨嘅時候,我勸佢唔好搵命搏,佢有咩事我唔知點算。

後來先生機警,褲袋有電話,佢用漫遊數據搜尋酒店電話,打咗好耐,先有酒店職員接聽,佢用最爛嘅日文去溝通,終於等到有人嚟救我哋,唔洗瞓街!

【 15 – 停電加出面發發聲,有啲似未日喪屍片嘅感覺⋯】

3:00am
突然全座酒店警鐘響起,我哋立即起身看過究竟。 四圍又黑又靜,仲要出面啲風雨聲好似鐵路咁響。我哋唔知出面有咩事,我好擔心會引發風災水浸之類,日本婆婆旅客都出咗嚟問咩事,好在最後都係虛驚一場。

不過我哋做足準備,執定行李放喺床邊,聽住轟轟咁大聲好似鐵路行走咁響嘅風聲,個心真係好驚,全晚都瞓得唔好,亦唔敢深眠。

【 16 – 旅行對比 】

(左)人哋喺島上影嘅相係咁嘅(右)我喺島上影嘅相係咁嘅😆

【 17 – Day 4 /30-9-2018: 無航機 】

原定前日返沖繩,今日飛香港,而家全部delay…
風走了,全島仍然停電,網路好差,就算用漫遊數據都唔穩定,未必收到

因未收到航班confirm 取消定延誤,琴美車我哋去機場打聽航班,今日仍然冇飛機返沖繩,聽日航班又滿席,意味我哋要留喺小島多兩日,好想快啲返香港

還記得颱風山竹襲港,好多大樹都倒下,相反呢度塌樹情況唔算嚴重。琴美都要小心揸車,有時道路被樹木阻擋,就要靠先生同琴美老公兩位壯丁沿路移開樹木,先可以繼續行程。沿路亦見到電線吹歪,屋頂飛走咗等情況。

【 18 – 謝謝電力公司 】

原來電力公司早已安排工作人員喺颱風前進駐喺島上,等颱風過後進行緊急搶修,盡快為島上居民恢復電力,抵讚!

【 19 – 島上唯一一間緊急營業的便利店 】

琴美再帶我哋周圍搵酒店,嘗試搵有冇一間後備發電嘅酒店,結果係冇⋯

因為仲有兩日要留喺島上,叉電尿袋尚餘一半,要慳住用

琴美之後帶我哋買食物,全島店鋪都冇營業,幸好有一間「緊急短暫營業」便利店,只開3小時,間店黑媽媽,但店內好多人買嘢,地下明顯比水浸過,店員幫忙抺地,收銀機冇電用唔到,拎紙版寄住數。

好在有日本朋友同先生係度,幫忙安排酒店同航班, 如果唔係唔知點算

【 20 – 謝謝防波提】

島上有兩排弱波石,方向不同,像藝術品一樣排列整齊。唔好睇少呢兩排,全靠佢先可以阻擋海浪嘅沖擊!

【21- 夜空】

因為停電,夜晚星空特別美🤗
太好了!晚上終於有返WiFi 同電視🍻 超開心,可以叉電了!

不過仲未有燈同冷氣…

#幾時脫離杯麵當正餐的日子? #好掛住屋企

【22 – Day 5 /1-10-2018 生日驚喜】

Happy birthday to me…

滯留喺島上,不如搵啲嘢做吓?好多日本人都鐘意嚟沖永良部島潛水或洞穴探險,佢問我想揀邊樣玩。

呢度有大約300個洞穴,今日約咗個教練帶我哋去caving,呢位教練原本係住喺東京,但因為熱愛海洋,嚟到呢度一見愛上,定居在此,佢身兼導遊、set燈、攝影加茶水,勁細心加專業,我哋要手腳並用左穿右插,先見到咁靚嘅limestone,amazing!

去caving 係佢想嚟呢個島嘅目的,以為打風冇緣,點知因爲滯留而失而復得,算係唔錯嘅禮物。

教練保障我哋安全,前一晚自己走一轉睇下水位去到邊,再決定是否成行,而我哋亦要著晒成套保護衣物,包括潛水Wet Suit ,連身衣,頭盔、護膝、手套,好在有呢身裝備,我先唔會整傷身體。

最後教練比咗驚喜我哋,佢用咗25支電筒幫我哋打燈,先至有咁光咁靚嘅環境,amazing!

【 23 -美好的一天】

今日每件事都好好

島上陸續恢復電力,酒店已經有返熱水、冷氣同燈,而電話網絡仍然未得,但酒店WiFi 仲好順,everything is ok

天氣又好好,難得體驗到caving ,雖然冇生日蛋糕,但今晚琴美整咗好好味嘅日式咖哩飯,大滿足

呢幾日佢幫咗我哋好多,ありがとうございます❤

【24 – Day 6 /2-10-2018 沖永良返沖繩】

全島仲未完全恢復電力,另外,沖永良機場X光機被颱風吹壞咗,要人手逐個檢查行李同背包。

總算由沖永良返咗嚟沖繩喇!可以隨意上網,食到想食嘅嘢,太好喇!係兩個世界!終於唔洗捱杯麵喇!

Last 一晚住好啲啦~ 聽日返香港喇~

【25 – Day 7 /3-10-2018 小確幸】

今日返香港喇!候機中遇上問卷調查,原本諗住好多說話想講,最後都係一句就算⋯

原本plan咗六日五夜,而家變咗九日八夜,冇咩嘢買到,但就有個好難忘嘅回憶

回港後我才感到原來好幸運!超強颱風「康妮」迫近日本,沖繩及鹿兒島縣奄美地區開始有雷暴,航空公司宣佈聽日來往香港到沖繩嘅飛機取消,好彩今日回程!如果班機delay 多一日,又唔知要困喺度幾耐!

而喺第二日,沖永良部島早上又開始停電了。。。

發佈留言

發佈留言必須填寫的電子郵件地址不會公開。 必填欄位標示為 *

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料