旅行時遇上颱風，停電停網停航點算好？滯留小島見聞錄

之前我哋去日本某小島 沖永良部島，旅行遇上超強颱風潭美，停電、停網絡又停航，被迫滯留小島走唔到，原本預2日嘅小島假期，最後住咗5日，一齊睇下我哋點樣迎接颱風嘅來臨啦！下次一旦遇上旅行停電，你都懂得如何應付，做足準備！

日本旅行遇上超強颱風，颱風吹襲小島前後之風景：

.

.

沖永良部島（日語：沖永良部島／おきのえらぶじま^{Okinoerabu-jima}）是奄美群島中的一個島嶼，位於德之島與與論島之間，面積94.5平方公里，相等於一個香港島咁大，為珊瑚礁隆起形成的島嶼。行政區屬於鹿兒島縣，島上設有和泊町和知名町，居民約14,000人。

【 01 – 有關沖永島部島 】

✦ 地理位置：
位於沖繩北部，屬於鹿兒島県
生活簡撲，是潛水、釣魚、洞穴探險好地方

✦ 人口：
約13000人

✦ 目的：
探日本朋友，體驗洞穴探險

✦ 預計逗留小島天數：
2日 （最後變咗5日…)

✦ 點去？
可以選擇坐飛機或坐船
如果坐飛機的話，由沖繩那霸出發約40分鐘，由鹿兒島出發則需約1小時

.

.

【 02 – 第一天：飛去沖永良】

暫時告別沖繩，坐JAC內陸機去鹿兒島的沖永良部島

飛機可容納48位乘客，約40分鐘就見到小島，第一眼印象係個島好平，無高山，好多田地，同埋啲水好清，見到海底㗎！

知道有個超強颱風潭美，48小時後由沖繩直衝去鹿兒島，途中風眼會喺島上經過，希望個風加速兼減弱，可以如期順利回來。

今晚住喺海邊酒店，擁抱太平洋，勁大風，吹到窗邊砰砰聲，海浪亦都越打越高，明明望到無際嘅海洋應該開心，不過因為打風關係，真係唔想住近海⋯

最後我哋決定改機票，聽朝提早飛返去沖繩

.

.

.

【 03 – 第二天：風來了！滯留沖永良】

原本我哋喺沖永良部島安排咗兩日一夜嘅豐富節目，因為超強颱風潭美來勢洶洶，來到呢個一日得一班機嘅荒蕪平地，仲要窗邊望見太平洋海浪一浪接一浪，我個心真係怯一怯，小島打風我超冇安全感⋯如果有得揀，我寧願喺沖繩度過颱風⋯

先生體諒我嘅不安，尋晚同JAC航空公司確定提早改機位今日飛、取消預約探險、安排酒店等等⋯ 點知今日去到機場，先知道來往沖繩嘅航機取消！因為那霸機場取消晒航班… 個風距離那霸仲有一段時間，當時只係相等於香港嘅一號風球，咁快就要CLOSE？OMG！意味住我要滯留呢個小島多幾日⋯ 依家未打風已經大浪到咁，聽晚風眼喺頭上面經過會係點？ 不敢想像！

.

.

【 06 – 我的海邊酒店 】

颱風越行越快，知道滯留喺小島，就要立即做足準備，先生知我望住個海好擔心，於是同朋友琴美安排搵到間遠離岸邊多少少，有個小山丘嘅酒店，（不過都係近海，只係冇望得咁清楚），而且酒店安排咗二樓嘅背海房 （已經係最高喇）相對較靜。

全個小島基本上好少外來人嚟，應該得我同佢係香港人，呢個島又冇高山可以向上走, 就等於一塊香港島咁大嘅滑板平地，好擔心會有風暴潮、水災等其他自然災害

#打咭告之臉書大神#見到機場但又走唔到

.

.

【 07 – 買食物 】

酒店講明聽日好大機會會全島停電，叫我哋自備食物，佢仲打定個底比我哋知，上年全島就試過停電7日！OMG！朋友琴美都話呢度啲居民都習慣咗打風停電…

搵咗酒店，放低行李後，我哋去超市買食物，不過全島得呢間超市比較大，啲麵包同水都已經被掃清， 我開心發現有一排排大支水，但原來係酒⋯

去到第二間超市，勉強比我哋搵到最後一支水，同埋買咗呢幾日嘅食物
唔敢諗幾時會返到屋企，只求平安渡過

.

.

【08 – 外遊時遇上風災怎麼辦？】

以下係我哋嘅少少體會：

1. 準備足夠食物和用具
✦ 食物方面：
✔ 可以預多啲食物同水
✔ 首選不是杯麵（怕冇熱水供應）
✔ 宜選提子、香蕉等生果容易食，補充水份又飽肚
✔ 朱古力，高熱量

✦ 用具方面：
✔ 電筒 （停電超有用）
✔ 哨子 （有乜事可求救）
✔ 扇 （ 窗外打風，不宜開窗，若然停電，室內必定又熱又焗）

2. 定期把情況及位置匯報給家人

3. 以紙筆寫定求助熱線，passport 及家人等聯絡方法，萬一手機無電都有保障

4. 和旅伴用不一樣的電話咭
（好重要！好重要！如果個台死咗就攬炒）

5. 儲定水以備不時之需
包括飲用水同普通水，以防停水
我哋問酒店拎咗兩個保溫瓶裝水，又用膠樽同浴缸儲水

6. 叉夠尿袋

7. 準備定娛樂節目
時間流流長搵定啲嘢做，例如畫畫，下載定apps , 書等等

.

.

【 09 – 風雨前夕 – 章魚燒派對 】

可能天氣關係，同上次超強颱風山竹一樣，我全日都好頭痛⋯ 之後去咗琴美屋企hea ， 我哋住嘅酒店同佢屋企只需要5分鐘車程，謝謝款待♥，琴美為我哋準備咗章魚燒派對，仲有佢整嘅飯糰同冬瓜湯、納豆秋葵同甜品，飽飽！

琴美有個歲半嘅囡囡，囡囡活潑好動，經常四圍走四圍跌，日本媽媽通常都係由得佢到處跌跌碰碰，相反香港媽媽就會勁擔心，每一步都要睇住。

超強颱風預計聽晚九點左右會經過上空，時間仲有好耐好耐，睇嚟聽日全日我哋有排發呆了⋯

.

.

【 10 – 停電好煩惱 】

為停電做準備，呢兩日嘅食物，應該充足🤗
颱風24號大約喺今晚9點上空經過，今早出咗避難勸告，大風又大雨，不過酒店話我哋住石屎屋唔洗走⋯

中午全島進入停電，電視無訊號，無Wi-Fi，電話咭數據都斷埋，我哋唔知出面嘅情況，好在仲有漫遊數據服務，可以知名道個風嘅動向

—————————
1. 冇得睇電視，唔知出面最新情況
2. 冇風扇又冇冷氣，打風不能開窗，房內又熱又焗
3. 冇得吹頭，洗完頭冇得即刻訓覺
4. 冇娛樂設施，好悶
5. 冇熱水，冇得煲水飲、冇得沖熱水涼、又冇得淥杯麵
6. 雪櫃冇電，新鮮食物宜盡快食
7. 冇燈，名符其實日出而作，日入而息
8. 冇得上網，斷絕外界聯繫
9. 冇得叉電，所有電子設備要慳住用
10. 冇得碌咭襟錢，只能付現金

由於唔知停電停幾耐，所以我哋啲電都要慳住用，盡量少掂電子嘢

.

.

【 11 – 停電如何消磨時間？ 】

全島停電，間房又黑又焗又熱又靜，淨係聽到出面橫風橫雨聲，成日流流長，做咩好？

#其實香港好幸福

.

.

【 12 – 我們的食物 】

幸好酒店樓下仲有熱水，唔洗淨係食朱古力，可以淥杯麪♥

.

.

【 13 – 時間過得太慢 】

要諗諗點樣消磨時間，畫下窗外風景：

.

.

【 14 – OMG！無帶鎖匙 】

呢間酒店設大館（接待處）同分館（住客），中間需要露天行一段小路（無遮無擋）， 平時行就無乜嘢，但今晚全座客樓客房停電，又黑又靜，成個分館只有我哋同一位日本婆婆旅客入住，連一個服務員都無（話哂都係鄉村地方）！外面風雨砰砰聲，連接大館嘅酒店接待處電話又壞咗，點求救？唔通我哋要喺走廊瞓成晚？呢度叫天不應叫地不聞，只係聽到窗外大風大雨嘅呯呯聲。原本先生諗住出去外面行去大館搵幫手，但依家係颱風嘅暴風區，最大風大雨嘅時候，我勸佢唔好搵命搏，佢有咩事我唔知點算。

8:00PM，先生話冇熱水落去樓下煲水，我同佢拎咗支電筒，離開房先發現鎖匙喺房內，大鑊！！

後來先生機警，褲袋有電話，佢用漫遊數據搜尋酒店電話，打咗好耐，先有大館嘅酒店職員接聽，佢用最爛嘅日文去溝通，終於等到有人嚟救我哋，唔洗瞓街！

.

.

【 15 – 停電加出面發發聲，有啲似未日喪屍片嘅感覺⋯】

3:00am
突然全座酒店警鐘響起，我哋立即起身看過究竟。 四圍黑媽媽，只聽到出面啲風雨聲好似鐵路咁嘈咁響。我哋唔知出面發生咩事，我好擔心會引發風災水浸之類，日本婆婆旅客都行出走廊問咩事，好在最後都係虛驚一場。

不過我哋做足準備，執定走佬背包放喺床邊，聽住轟轟咁大聲好似鐵路行走咁響嘅風聲，個心真係好驚，全晚都瞓得唔好，亦唔敢深眠，呢晚過得好漫長…

.

.

【 16 – 旅行對比 】

(左）人哋喺島上影嘅相係咁（右）我喺島上影嘅相係咁嘅

天堂與地獄嘅對比，今次來得唔合時，希望走前可以見下呢個美麗嘅小島…

.

.

【 17 – 第四天： 無航機 】

原定前日返沖繩，今日飛香港，而家全部delay…
風終於走了，不過全島仍然停電，網路好差，就算用漫遊數據都唔穩定，未必收到

因未收到航班confirm 取消定延誤，琴美車我哋去機場打聽航班，今日仍然冇飛機返沖繩，聽日航班又滿席，意味我哋要留喺小島多兩日，好想快啲返香港 T_T

還記得颱風山竹襲港，好多大樹都倒下，相反呢度塌樹情況唔算嚴重。琴美都要小心揸車，有時道路被樹木阻擋，就要靠先生同琴美老公兩位壯丁沿路移開樹木，先可以繼續行程。沿路亦見到電線吹歪，屋頂飛走咗等情況。

.

.

【 18 – 謝謝電力公司 】

可能小島經常停電，電力公司原來早已安排工作人員喺颱風前進駐喺島上，等颱風過後進行緊急搶修，盡快為島上居民恢復電力，抵讚！

.

.

【 19 – 島上唯一一間緊急營業的便利店 】

琴美再帶我哋周圍搵酒店，嘗試搵有冇一間後備發電嘅酒店，結果係冇⋯

因為仲有兩日要留喺島上，叉電尿袋尚餘一半，要慳住用

琴美之後帶我哋買食物，全島店鋪都冇營業，幸好有一間「緊急短暫營業」便利店，只開3小時，間店黑媽媽，但店內好多人買嘢，地下明顯比水浸過，店員幫忙抺地，收銀機冇電用唔到，拎紙版寄住數。

好在有日本朋友同先生係度，幫忙安排酒店同航班， 如果唔係我都唔知點算

.

.

【 20 – 謝謝防波提】

島上有兩排弱波石，方向不同，像藝術品一樣排列整齊。唔好睇少呢兩排，全靠佢先可以阻擋海浪嘅沖擊！

.

.

【21- 夜空】

因為停電，夜晚星空特別美🤗
太好了！晚上終於有返WiFi 同電視🍻 超開心，可以叉電了！

不過仲未有燈同冷氣…

#幾時脫離杯麵當正餐的日子？ #好掛住屋企

.

.

【22 – 第五天：生日驚喜】

Happy birthday to me…

滯留喺島上，不如搵啲嘢做吓？好多日本人都鐘意嚟沖永良部島潛水或洞穴探險，先生問我想揀邊樣玩。

呢度有大約300個洞穴，今日約咗個私人教練帶我哋去caving，呢位教練原本係住喺東京，但因為熱愛海洋，嚟到呢度一見愛上，定居在此，佢身兼多職：導遊、set燈、攝影加茶水，勁細心加專業，我哋要手腳並用左穿右插，先見到咁靚嘅limestone，amazing!

去caving 係先生想嚟呢個島嘅目的，以為打風冇緣，點知因爲滯留而失而復得，算係唔錯嘅禮物。

教練保障我哋安全，前一晚自己走一轉睇下水位去到邊，再決定是否成行，而我哋亦要著晒成套保護衣物，包括潛水Wet Suit ，連身衣，頭盔、護膝、手套，好在有呢身裝備，我先唔會整傷身體。我少做運動，洞穴黑媽媽要用電筒先勉強見到，Caving 經常爬高爬低、手腳並用，係有啲攰同辛苦，教練從中鼓勵我哋：「就快到架喇」

最後教練比咗驚喜我哋，去到一個地方，教練叫我哋熄咗電筒背住等佢5分鐘，原來佢用咗25支電筒幫我哋打燈，營造相片呢個咁光咁靚嘅洞穴仙境，amazing!

我哋呢個初體驗約1.5小時，教練話如果玩埋進階（玩4-5小時），行入啲，會發現更多仙境！（我體驗夠了，HAHA…)

.

.

【 23 – 美好的一天】

今日每件事都好好♥

島上陸續恢復電力，酒店已經有返熱水、冷氣同燈，而電話網絡仍然未得，但酒店WiFi 仲好順，everything is ok ♥

天氣好好，我哋又好難得體驗到caving ，雖然冇生日蛋糕，但今晚琴美整咗好好味嘅日式咖哩飯，大滿足 ♥ 今年生日好難忘！

呢幾日琴美幫咗我哋好多，ありがとうございます❤

.

.

【24 – 第六天：沖永良返沖繩】

全島仲未完全恢復電力，而沖永良機場X光機被颱風吹壞咗，要人手逐個檢查行李同背包。

YEAH！總算由沖永良返咗嚟沖繩喇！可以隨意上網，食到想食嘅嘢，太好喇！係兩個世界！終於唔洗捱杯麵喇！

Last 一晚住好啲啦～ 聽日返香港喇～

.

.

【25 – 第七天：回程的小確幸】

今日返香港喇！候機中遇上問卷調查，原本諗住好多說話想講，最後都係一句就算⋯

原本成個旅程 （沖繩 ＋沖永良部島）六日五夜，而家變咗九日八夜，冇咩嘢買到，但就有個好難忘嘅回憶，亦體會到香港有幾便利，幾美好！

回港後我才感到原來好幸運！因為另一超強颱風「康妮」又迫近日本，沖繩及鹿兒島縣奄美地區開始有雷暴，航空公司宣佈聽日來往香港到沖繩嘅飛機取消，好彩今日回程！如果班機delay 多一日，又唔知要困喺小島幾耐喇！

而喺第二日，沖永良部島早上又開始停電了。。。

總結：9-11月係當地打風季節，去前請三思 ：P

From 27/9 to 3/10/2018 – 日本沖永良部島之旅