人人都開Patreon，唔通一定賺？最勁嗰位每月搵到幾多？
今年市道唔好，大家都尋求開源方法，而且YouTube因涉及敏感／政治題材經常「黃標」，令Youtuber收入大減，喺各種因素下，令好多人都開個Patreon戶口，希望可以增加收入。
Patreon係一個畀Content Creator（內容創作者）進行群眾募資嘅平台，創作者通過平台提供內容，吸引贊助者購買文章／訂閱，從而取得資金繼續創作。收費／服務全部由創作者自己決定，創作者通常將最精彩、最吸引嘅部份放入Patreon限定內容部份，希望 Fans 能付費成為贊助者。
不過，開Patreon係咪一定賺？可以賺到幾多？graphtreon網站列出全球Patreon top 1000 creators排名及其每月賺錢金額，當中第二位 Chapo Trap House （美國政治 Podcast）有 35,157 位贊助者，每月收入大約係 $157,476 美元！！！而第五位嘅係嚟自香港嘅 蕭若元（蕭生），有成 26,628 人訂閱，佢個Package分別係$5/ $50美元一個月，以基本 Package 計算，每月保守估計都有大約10萬美金收入（未扣手續費）！！另外，沈旭暉排名第80位，有6,092人訂閱，佢個Package分別係$10/ $25美元一個月，以基本 Package 計算，每月保守估計有大約6萬美金收入！
再睇返全球Patreon top creators，我哋都睇到一啲數據：
- 多數已有一定知名度
- 知識型內容，並以 Podcast 同 Video 為主
- 成人嘢呢啲當然都有市場啦！
身為繪本作者，梗係關注吓畫畫搵唔搵到食啦，於是我哋再睇下全球 Top Comics Creators 排名，除咗頭2位Creator過萬人訂閱，其餘都係得千幾二千，再睇返收入排名，現有數據排首名為 Top 7 嘅 ABBADON ，發表怪異幻想漫畫《殺死六十億惡魔》，現在每月收入約 $7,496 美元。而如果拎返已有數據嘅首99位 Top Comics Creators收入，平均每月收入約$1,850美元。
就咁睇好似收入都唔錯？不過呢個係全球統計，暫時Top 99 Comics Creators未見到香港創作（最少驟眼嚟睇見唔到中文名）。創作者需要時間創作，並唔係㩒個掣就攪掂，希望大家都可以對創作者畀多一份尊重同鼓勵，令到同行可以繼續走下去！
