網紅行銷！如何增加人氣？曾經幫網紅追Fans，如何衝破60萬訂閱？

如何增加網紅人氣？ 尤其原本KOL（Youtuber）已經有幾十萬訂閱，極受歡迎，點樣令到佢更上一層？除咗KOL本身嘅勤力同創意，仲有賴佢身邊嘅一班團隊一齊努力。小妹曾經為一班KOLs 策劃宣傳，以下只係本人經驗之談，亦要配合天時、地利人和。

1. 首先搵出邊啲係Super Fans

如果達到一定受歡迎程度，總會有一班Super Fans為偶像開IG，專貼偶像啲相或自製圖，你可以先做下功課搵出一批Super Fans比較多其他Fans Follow嘅人，然後比甜頭佢成為你嘅合作伙伴，令佢哋更有優越感。如以官方身份邀請佢來開會，聽下佢哋意見、又或者比第一手消息佢Share等等，令Super Fans 心甘情願幫KOL製造更多宣傳，有時會比官方推動更有效。

（但謹記：越多Fans越多是非，記得同時要清楚知道Fans關係圖，以免得失其他Fans）

2. 幫KOL增加現場名氣

每次KOL出席活動都會喺專頁預告，又或者順道攪啲小Campaign，等Fans過嚟捧偶像場，令到場內名氣更高漲，吸引更多在場人士嘅留意，製造話題，期望轉而欣賞支持。試過同一場合，KOL Fans多過啲歌手Fans好多，變成討論區話題。

3. O2O全天候幫KOL宣傳

O2O好重要，除咗Offline，Online更需要配合，除咗KOL本身勤力拍片，我哋亦可以利用Story或花絮片拍攝偶像不為人知嘅一面、亦可同Fans互動，玩投票、製造Stickers等等，保持人氣不減。

4. 尋求更多曝光途徑

乜都試下，搵傳媒訪問、專欄、與歌星／同級KOL 合作等等，增加更多曝光機會

5. 策劃活動，增加名氣

Campaign可以係Online，亦可以Offline O2O, 之前試過攪電影優先場、Fans Meeting、Online Campaign等等，試過場地所限，名額只有60位，結果有幾百位Fans超額報名！Sales搵到品牌贊助，品牌得到宣傳機會； Fans玩得開心，瘋狂打咭製造話題；KOL從中增加更多名氣，公司亦賺到錢，達到幾面Win Win！

6. 製造驚喜，感動Fans，幫大家製造美好回憶： 

除咗做多啲互動，亦要製造不同驚喜，例如KOL生日，活動前Online徵集Fans嘅祝福，然後剪成祝福片喺生日會比KOL睇。又或者一人一句Fans對偶像之說話，然後裱成大Board貼出嚟展示，又或者KOL拍片回應Fans問題等等，Fans見到自己得到重視，會特別開心。

7. 製造KOL專屬產品

呢個係關乎KOL品牌形象，當KOL受歡迎，Fans自然想要佢嘅副屬限定產品，例如Fans Member、Fans Tee、Fans帽等等，既可塑造團隊精神、且Fans更有歸屬感，外人睇到更有氣勢，公司亦可從中穫利。

講到尾，以上呢啲招數都只係輔助，最重要係KOL（Youtuber）本質同魅力，如果佢本身唔合作、又或者質素差等等，我哋都好難幫到佢…

思詩公主 插畫