【英國生活】想念冷氣巴

以前英國夏天都唔算好熱，但呢幾年溫室效應攪到氣溫越嚟熱高，上星期倫敦呢邊有幾日都好熱，氣溫大約28-30度。或者相比香港，呢個溫度只係濕濕碎，但香港到處都有冷氣，只要留喺室內地方，就會涼浸浸，有啲地方仲凍到要著返件外套添！

相反喺英國，唔多地方有冷氣，就算有都係比較微弱嘅冷氣。就算我去社區中心上興趣班，成間中心都無冷氣，天氣太熱同學無心機上堂，老師都會提早落堂，比我哋早啲返屋企休息。

而我喺夏天覺得比較困擾嘅事係坐巴士，呢度啲巴士部份窗口可以打開少少窗，內部亦有微弱涼風，但無冷氣。天氣一熱人又多，成架巴士就變咗又熱又焗又曬嘅熱狗巴，再加埋其他人嘅體味，真係焗到有啲透唔到氣，好彩隨身帶咗把扇撥吓涼通吓風，嗰刻好掛住香港嘅冷氣巴！

呢邊好少屋企有冷氣機，前幾日同德國鬼佬傾計，佢話熱到瞓唔到，我問佢會唔會考慮裝返部冷氣？佢話考慮到環保問題暫時想天然啲 。我同佢講喺香港普遍家家戶戶都有冷氣，平均每間屋都有2-3部冷氣機，佢個反應好驚訝同不能想像呢！